Cilësia e UjëraveRaportim nga qytetarët: Ndotje në zonën e Plazhit të Vjetër në Vlorë
Në redaksinë e Gjurmon.al ka mbërritur një foto që tregon se, në Plazhin e Vjetër, ujërat e zeza derdhen drejtpërdrejt në det, në sytë e të gjithë pushuesve. Siç shihet edhe nga pamjet, duket qartë një tub shkarkimi, nga i cili derdhen ujëra të zeza pranë vijës bregdetare, vetëm pak metra larg zonës së frekuentuar nga pushuesit. Situata ngre shqetësime serioze për ndotjen e mjedisit dhe rrezikun që paraqet për shëndetin publik. Ky fenomen nuk është i izoluar vetëm në Plazhin e Vjetër, pasi Gjurmon.al ka dokumentuar edhe raste të tjera të derdhjes së ujërave të zeza në det në zonën e Lungomares. Pavarësisht denoncimeve të përsëritura dhe ankesave të banorëve, situata vijon të mbetet e pazgjidhur. Në kulmin e sezonit turistik, pamje të tilla dëmtojnë jo vetëm ekosistemin detar, por edhe imazhin e Vlorës si një nga destinacionet kryesore turistike të vendit. Qytetarët dhe pushuesit kërkojnë ndërhyrje të menjëhershme nga institucionet përgjegjëse për të ndalur derdhjen e ujërave të ndotura në det. Sipas tyre, kjo situatë përsëritet çdo vit dhe ata shprehen se kanë frikë nga përhapja e sëmundjeve për shkak të derdhjes së ujërave të zeza shumë pranë vendeve ku lahen në det. Burimi: Gjurmon
Krimi mjedisorShkarkonte mbetje në lumin Vjosa, procedohet penalisht për ndotje të ujërave
Në kuadër të masave për parandalimin dhe goditjen e veprimtarive që dëmtojnë mjedisin dhe cenojnë ekosistemet natyrore, strukturat e Policisë së Shtetit, në bashkëpunim me Autoritetin Kombëtar të Ushqimit (AKU) Gjirokastër, evidentuan një rast të ndotjes së ujërave të lumit Vjosa, si pasojë e ushtrimit të një aktiviteti të paligjshëm. Nga kontrollet e kryera në fshatin Qilarisht, Përmet, u konstatua se një ambient banese ishte përshtatur si thertore jashtë standardeve higjieno-sanitare dhe se mbetjet e krijuara nga procesi i therjes shkarkoheshin përmes një tubacioni direkt në lumin Vjosa. Shkarkimi i mbetjeve organike në ujërat e lumit përbën një rrezik të drejtpërdrejtë për ndotjen e burimeve ujore, dëmtimin e biodiversitetit dhe prishjen e ekuilibrit të një prej pasurive më të rëndësishme natyrore të zonës së Përmetit. Gjatë kontrollit në ambient u konstatuan kafshë në proces therjeje, produkte dhe mbetje të aktivitetit, si dhe elemente të dyshuara të parregullta lidhur me identifikimin e bagëtive. AKU ndërhyri menjëherë duke bllokuar ambientin ku zhvillohej veprimtaria e paligjshme, ndërsa ndaj pronarit u vendos masë administrative në vlerën 200 000 lekë të rinj. Në përfundim të veprimeve hetimore, u arrestua në flagrancë shtetasi A. L., 62 vjeç, banues në fshatin Qilarisht, Përmet, për veprat penale që lidhen me ndotjen e ujërave, prodhimin e kundërligjshëm të produkteve ushqimore, falsifikimin e dokumenteve dhe fshehjen e të ardhurave. Gjithashtu, u proceduan penalisht dy veterinerë, L. D., 54 vjeç, dhe Y. H., 66 vjeç, për shpërdorim detyre, pasi dyshohet se nuk kanë kryer kontrollet dhe masat e kërkuara ligjore për aktivitetin e ushtruar. Burimi: Policia e Shtetit
NatyraMasakër mjedisore në Sevran të Skraparit, qindra pemë priten pa u damkosur
Në emisionin e fundit të “Fiks Fare” në Top Channel raportohet një rast i dyshuar i masakrës mjedisore në malin e Sevranit në Skrapar, ku një kompani e licencuar për shfrytëzimin e pyjeve akuzohet se ka prerë pa kriter qindra pemë, pa respektuar procedurën e damkosjes së tyre përpara prerjes. Pamjet e siguruara nga emisioni Fiks Fare tregojnë stiva drush të vendosura përgjatë rrugës, me gjatësi që arrijnë deri në 10 metra, ndërsa në zonë shihen sipërfaqe të tëra të zhveshura nga pemët. Punëtorët e firmës vijojnë prerjen e pyllit, por sapo konstatojnë praninë e dronit, largohen nga vendi. Gjatë bisedës me gazetarët, dy punëtorë që kryenin prerjen e druve pranojnë se nuk kanë parë asnjë pemë të damkosur përpara prerjes. Ata deklarojnë se njohin vetëm emrin e pronarit të firmës, Sokol, ndërsa njëri prej tyre tregon se ka punuar prej vitesh në sektorin pyjor dhe se, në raste të tjera, pemët që duhej të priteshin ishin identifikuar më parë nga autoritetet. “Kam punuar gjithë jetën në pyje. Kur kam punuar në Korçë, pemët ishin të damkosura. Këtu po i presim vetë dhe jemi munduar të lëmë ndonjë pa prerë”, shprehet ai. Përballë gazetarëve mbërrin edhe pronari i firmës, i cili deklaron se disponon leje të rregullt shfrytëzimi. Por, kur pyetet se kush i ka përcaktuar pemët që duhej të priteshin dhe ku ndodhen pemët e damkosura, ai fillimisht pretendon se procedurat janë ndjekur, por më pas nuk arrin të tregojë asnjë pemë të damkosur në terren. Në fund të bisedës, ai kërkon ndërprerjen e xhirimeve. Edhe drejtori i shërbimit pyjor pranë Bashkisë Skrapar pranon se pemët nuk janë damkosur, ndonëse kjo është një procedurë e detyrueshme përpara çdo prerjeje. Sipas tij, firma është e pajisur me leje për prerje drush zjarri, ndërsa inspektori i zonës ka kryer kontroll, por ende nuk ka dorëzuar procesverbalin përkatës. Drejtori pranoi se damkosja e pemëve duhej të ishte kryer dhe premtoi se do të dilte menjëherë në terren për të verifikuar situatën dhe për të marrë masa ndaj firmës, nëse konstatohen shkelje. Pas interesimit të gazetarëve, në dijeni të rastit u vu edhe kryetari i Bashkisë Skrapar, i cili premtoi verifikimin e plotë të procedurave dhe marrjen e masave administrative ndaj çdo personi apo institucioni që ka shkelur ligjin, duke pranuar edhe përgjegjësinë institucionale për situatën e krijuar. Burimi: Top Channel
Ndotja IndustrialeNdotje mjedisore në Dhërmi, pesë subjekte ndëshkohen me pezullim aktiviteti dhe gjoba
IKMT ka marrë masa ndaj pesë bizneseve që operonin në zonën e Dhërmiut, pas konstatimit të shkeljeve të kushteve mjedisore gjatë aktivitetit të përpunimit të inerteve. Inspektorati Kombëtar për Mbrojtjen e Territorit (IKMT) ka ndërhyrë në zonën e Dhërmiut, pjesë e Bashkisë Himarë, pas denoncimeve të qytetarëve për ndotje mjedisore të shkaktuar nga aktivitetet industriale në territor. Sipas njoftimit të IKMT-së, kontrollet e kryera nga Drejtoria e Inspektimit të Mjedisit dhe Ujërave kanë evidentuar mosrespektim të kushteve të përcaktuara në lejet mjedisore për aktivitetet e fraksionimit dhe ndarjes së inerteve të gurit. Për shkeljet e konstatuara, janë marrë masa administrative ndaj pesë subjekteve: Gjoka Konstruksion, Gjikuria, Anchor Beton, Eral Construction Company dhe Beton Express 2018, të cilat janë ndëshkuar me gjoba dhe pezullim aktiviteti. Ndërhyrja vjen në një zonë me presion të lartë turistik, ku aktivitetet ekonomike dhe ndërtimore përballen me kërkesa të shtuara për respektimin e standardeve mjedisore. IKMT deklaroi se do të vijojë kontrollet dhe masat ndëshkuese ndaj subjekteve që shkelin legjislacionin në fushën e mjedisit, ndërtimit dhe mbrojtjes së territorit. Burimi: IKMT
Raportim MjedisorZjarrvëniet në vend, Policia e Shtetit: 29 persona të arrestuar dhe proceduar në një muaj e gjysmë
Policia e Shtetit vijon kontrollet dhe hetimet në terren për parandalimin e zjarrvënieve, ndërsa gjatë 24 orëve të fundit ka arrestuar dy persona dhe ka proceduar penalisht një tjetër për tre raste të ndodhura në Kavajë, Vorë dhe Mallakastër. Sipas njoftimit zyrtar, gjatë muajit qershor dhe dy javëve të para të korrikut 2026 janë arrestuar dhe proceduar penalisht gjithsej 29 persona, të dyshuar si autorë të zjarrvënieve në zona të ndryshme të vendit. Në Kavajë u arrestua shtetasi S. Ç., 51 vjeç, banues në fshatin Sterbeg. Sipas Policisë, ai dyshohet se ndezi zjarr në një sipërfaqe toke në pronësi të tij, duke shkaktuar dëmtimin e kullotave dhe djegien e rreth 300 pemëve, kryesisht agrume dhe ullinj. Një tjetër arrestim u krye në Vorë, ku në pranga përfundoi shtetasi A. D., 43 vjeç, banues në fshatin Gjokaj. Ai dyshohet se ndezi zjarr në një sipërfaqe toke në pronësi të një personi tjetër, duke shkaktuar djegien e një zone të mbjellë me dru frutorë. Ndërkohë, në Mallakastër, Policia referoi materialet në Prokurori dhe nisi procedimin penal ndaj shtetasit O. B., 39 vjeç, banues në fshatin Levan. Sipas hetimeve paraprake, gjatë tërheqjes me karrotrec të një automjeti të aksidentuar janë krijuar shkëndija elektrike, të cilat kanë shkaktuar një zjarr që dogji dhjetëra pemë arre në pronësi të një shtetasi, në fshatin Romës. Materialet procedurale i janë referuar prokurorive kompetente për veprime të mëtejshme. Policia e Shtetit u ka bërë sërish thirrje qytetarëve, fermerëve dhe pronarëve të tokave e kullotave që të mos ndezin zjarre në asnjë rrethanë, duke theksuar se djegia e mbeturinave në toka bujqësore ose kullota përbën rrezik serioz për përhapjen e flakëve dhe cenon pronën, shëndetin dhe jetën e qytetarëve. Autoritetet ftojnë qytetarët të denoncojnë menjëherë çdo rast të dyshuar të zjarrvënies, duke garantuar ruajtjen e anonimatit dhe reagim të menjëhershëm. Burimi: Policia e Shtetit
Cilësia e UjëraveIKMT konstaton shkelje mjedisore në Palasë, gjobitet subjekti “Gjikuria”
Inspektorati Kombëtar i Mbrojtjes së Territorit (IKMT) ka ushtruar një inspektim në zonën e Palasës, ku ka verifikuar zbatimin e ligjshmërisë mjedisore në një subjekt privat. Gjatë kontrollit, trupa inspektuese e Drejtorisë së Inspektimit të Mjedisit dhe Ujërave ka konstatuar se impianti i trajtimit të ujërave të ndotura i administruar nga kompania “Gjikuria” operonte pa Leje Mjedisore të Tipit B, e cila është e detyrueshme sipas legjislacionit në fuqi. Për shkeljen e evidentuar, IKMT ka vendosur masë administrative me gjobë ndaj subjektit dhe ka urdhëruar pajisjen e menjëhershme me lejen përkatëse mjedisore, në përputhje me kërkesat ligjore. Rasti ngre sërish vëmendjen mbi respektimin e standardeve mjedisore në zonat bregdetare, ku aktivitetet infrastrukturore kërkojnë monitorim të vazhdueshëm dhe zbatim të rreptë të ligjit. Burimi: IKMT
